الذوق " .. ع الطريقة البولاقية
القوة شئ .. والعنف شئ تانى
القوة متانة فى الشخصية وضبط للارادة
العنف انفعال بيعبر عن ضعف
ولا يمكن للناس تقول على المنفعل أبو صوت عالى المتهور فى تصرفاته " بطل " او " جدع " او " راجل "
الرجولة مش بالصوت
والبطولة مش بالخبط والرزع
ومصائب الانفعال تقع أول ما تقع على الشخص نفسه .. حيث الندم بعد فوات الاوان .

سخن .. ساب نفسه .. ضرب .. دخل السجن
والكبرياء مدخل رائع لعدونا اللدود اللى اسمه " ابليس " .. بوابة مفتوحة على اخرها يخش منها الشيطان ويلعب براحته .
" انا " .. " انا " .. " انا " هى البدايه الخطيره لضياع " انا ".
التشبث بالرؤية الشخصية وكأنها الرؤية الوحيدة والصحيحة والأخيرة والحاسمة .. ينتهى حتما بالصدام
مش انت بس اللى لك عيون وعقل ومصلحه
غيرك زيك بيشوف وبيفكر وله ظروفه .

واستسلامنا جميعا للغضب له نتيجه واحده ما فيش غيرها ... الصراع المتصاعد الى حد القتال . هل هذه قوة  ؟
استمع الى جواب نبيك ( ص ) وهو يقول :  " ليس الشديد بالصرعه "
أى ليس القوى بالانفعال والسلوك الطائش
وأحد الصحابه سأل الرسول ( ص ) ان ينصحه .. فبماذا نصحه ؟
قال له : " لا تغضب "

فالغضب ظلام أسود فاحم يطبق على نور العقل .. ويزج بالسلوك نحو الهاوية ..

والسلوك – قول او فعل – لا يصدر عن الانسان الا باشارة من المخ .. والمخ لا يبعث باشارات الا استجابة لارادة وقرار داخلى
وارادة الايمان كفيله بضبط السلوك .. كفيلةبالتحكم فى الغضب ارادة الايمان تعطى أوامرها للمخ قبل أن يوجه المخ ذراع الانسان ولسانه ورجله .

الايمان لا هو فلسفة ولا هو دروشه .... هو الحياة الطيبة الأمنة لو انتصرنا على النفس .. النفس الأماره بالسوء التى تزين لك الكبرياء وتصور لك التسامح على أنه ضعف .. والتسامح ليس ضعفا ..التسامح غصن جميل فى شجرة الايمان .. التسامح له معنى علمى وتفاصيل محددة هل تصدق اننا فى المدينة الواحدة نتحدث بعدة لغات ....اللغه مش قوالب جاهزة نتبادلها زى بواكى الشاى وعلب الكبريت .

اللفظ الواحد يختلف معناه باختلاف الاشخاص الجملة الواحدة لها أكثر من تفسير حسب المتكلم وحسب السامع ....المحامى غير السمسار غير الفنان

انت ممكن تقول لابن البلد الجدع الشهم
" لو سمحت يا أستاذ  " يزعل منك  ويفتكرها تريقه
يعنى التسامح يحتم الصبر فى الخطاب مع الاخرين ..
لا تنفعل بشكل فورى لكل جمله تسمعها .
لو راجل بسيط على سلم الاتوبيس بيقولك " وسع لى "
انت برقتك وأدبك اللى اتربيت عليه يمكن تظنه بيتكلم زق وجليطه ......
أصبر عليه .. بص له كويس .. تكتشف ان دى امكانياته فى التعبير .. دى ثقافته ..
دى " الرقة " عنده .
شفت التسامح بيعمل ايه ؟
بيديك فرصه للتدبر ...
مش طوالى تهب فى الراجل وتقوله : " اتكلم بذوق "
ما هو بيتكلم بذوق بس ع الطريقه البولاقية.