لو شفت واحد شايل البلاوى اللى جايه وماشى بيها بين الناس .. اعرف انه حاصل  على الدكتوراه بامتياز فى " ضعف الايمان " مع مرتبة الاستهتار الأولى :

- يحب يعمل خير يحس بتقل كان رجليه مربوطة فى شكاير رمله .
- يشوف المنكر لا يحس ولا يزعل .
- متعلق بالدنيا فاكرها دايما حتدوم .
- أخر حاجه يفكر فيها أوضاع المسلمين وهموم المسلمين .
- لما يناقش يقاوح والسلام.. مش عايز يوصل للحقيقه .
- البرهان عنده عقلانى بحت .. يعنى ما ينفعش تقوله " قال الله ..قال الرسول " .
- يعمل السيئه وربك يستره بالليل .. يفضح نفسه بالنهار .                                           

حكيت المواصفات دى لسواق ميكروباص قريبى .. قال لى الجدع ده مش بس عايز " غسيل " ونفخ كوتش وضبط زوايا .... دا عايز معاهم تغيير عفشه وعمرة موتور .. ويا ريت يغير من جاز لغاز طبيعى .

قعدت مع نفسى ورحت عامل ترجمة لكلام قريبى السواق عشان أروح بالترجمة لصاحبنا بتاع الدكتوراه :

• نفخ كوتش وظبط زوايا عشان يمشى صح فى اتجاه البيت والشغل والجامع بدل اتجاهات تانيه .
• عايز غسيل يعنى عايز ينظف نفسه م المعاصى .. ولو اتوسخ ، يغسل تانى
• تغيير عفشه .. يجدد نفسه ويسيب أهل السوء ويقرب م الطيبيين .
• عمره موتور : الخوف م النار والطمع فى الجنه هو المحرك الحقيقى لعربة الايمان .. اللى عايز يتحرك سليم يفتكر الأيه :                                                 " فمن زحزح عن النار وأدخل الجنه فقد فاز "
• من جاز لغاز طبيعى يعنى بدل ما يبقى لمزاجه وهواه يبقى لله ورسوله والمسلمين .