الترتيب مع حسن شحاتة وكأس أفريقيا 
انت عارف ان كابتن شحاتة– ما كنش لاعب عبقرى ولا حاجة ... كان لاعب عادى لا بشرطه ولا ع الحجر ولا أخر العنقود ... لكن كمدرب كان نادر جدا ... مميز .. فت ... وأجدع ميت مرة من تاراديلى الايطالى اللى لهف ملايين وضيعنا ...
ايه سبب تميز شحاتة كمدرب رغم مستواه العادى كلاعب ؟
السبب " اسم " و " صفه " ... " مخ مرتب "
صفه مميزه عنده اسمها " الترتيب " .
والترتيب هو اللى جاب لنا بطولة افريقيا ) .

" الترتيب " كلمة السر لفتح باب المغارة – مغارة الحياة الواسعة الغريبة المليئة بالكنوز .

ساعات بنسمع عن واحد عضو فى نادى كذا وفى مجلس ادارة مش عارف ايه ورئيس جمعية الذى منه ومندوب اتحاد ال.... وناجح فى الكل
ازاى ؟  ............... مظبط اموره.

" الترتيب يوفر لك الوقت والجهد العضلى  والجهد الذهنى .
نفترض انك بتبحث عن كتاب ومش عارف حطه فين .. تلاقى نفسك بتفتح درج المكتب ودرفة الدولاب وفوق الرف وتحت التربيزه وجنب التلفزيون وخلف الكوميدينو ... ويمكن يطلع فى الاخر جوه فرن البوتجاز !!!
وقت ضايع
مجهود حركى
ارهاق ذهنى

" الترتيب " أحد الفوائد العظيمة للصلاة ...
المواقيت الخمسة بتقسم لك اليوم ... بتعودك ع النظام .. بتخلى ودنك مع صوت الأذان وعينك مع مؤشر الساعه ... ويا ريت مواعيدنا تبقى مع التقسيمة الربانية ..
( قابلنى المغرب فى جامع كذا ) بالاضافة طبعا لمواعيد تانيه فى اماكن تانية .
والترتيب حيخلى الناس تحترمك لانضباط تصرفاتك .. ويحقق لك الجمال فى البيت والمكتب وده بينعكس طوالى على حالتك النفسية .... مش لما يبقى كل شئ مكانه
 " الصورة تطلع أحلى " ؟!

ونوته صغيرة ب 1/4 جنيه تساعدك على تدوين الأولويات وعدم نسيان الرفايع .. لأنك حتكتب فيها :
      السبت...... الساعه ( 10) استلام الملف .
                     الظهر .. شريف
                    فى العوده .. شراء بطيخة كطلب الوالدة .

مش عيب وأنت مسافر كليات الأقاليم تكتب فى النوته ام 1/4 جنيه
( كرنيه – بطاقه – فلوس – منديل – أوراق ......) عشان ما تقعش من مخك حاجه
والعمل المناسب فى وقته المناسب نوع من الترتيب .

عايز تجرى 5 كيلو عشان تخس .. معقول تجرى والشمس عموديه على مدار السرطان  ؟ 

أما توزيع الادوار .. او الاعفاء من المهام الثانويه .. فهو أقصر طريق لانجاز المهام الرئيسية .
لما تكون بتخلع" الهارد " أو عندك قلق فى " السى دى روم " او"بليه الماوس" معلقة او السماعه فاصلة وقف معاك اخوك الصغير يناولك مفك ..يدوس على الفاره .. يخلى ودنه مع السماعه ..

وما دام الكلام " ترتيب " .. تعالى نرتب من تانى كلامنا  :
• شحاتة مدرب متميز ....يا ترى ليه ؟
• النجاح فى عضوية النادى مع المجلس مع الجمعية مع النقابة ..تفسيره ايه؟
• شئ بيختصر الزمن ويريح العضلة ويهدى الذهن  .. تعرف اسمه ؟
• الصلوات الخمسه مواقيت معلومة ... عشان كده هى الاصل لفكرة ......
• هو انضباط فى تصرفاتك يقابله احترام من الاخرين ... يبقى مين ؟
• يحقق لك الجمال والراحه النفسية .... تسميه ايه ؟

وفى الاخر نوته صغيره تساعدك على تدوين الأولويات ... عشان لو فى البيت قالو لك هات لنا معاك فاكهة وأنت راجع من الاجتماع .... أوعى تشترى فى الأول بطيخه ع السكين وتخش بيها اجتماع مجلس الادارة .